Aukerarik gabe

Realak 1-7 galdu du FC Barcelonaren aurka gaur arratsaldean Zubietan. Txuri-urdinek ordu laurdenera arte iraun dute; hortik aurrera, Europako txapeldunen nagusitasuna oso nabaria izan da.

Hasiera oso parekatua izan da eta aukera argi bat izan du talde bakoitzak. Lehena Bronzek izan du, Marionak eskuinetik egindako erdiraketaren ostean apur bat desbideratuta joan den erremate gurutzatuarekin. Txuri-urdinen onena handik gutxira iritsi da, Vanegasen falta batek langa jo ondoren. Lastima. Hortik aurrera, bartzelonarren nagusitasun osoa, partida ordu erdian erabakita utzi baitute. Lehenik Vickyren eskuinkada batekin area kanpotik. Handik gutxira Paralluelorena iritsi da, area aurrealdetik jaurtitako ezkerkada bati esker. Berriro ere Salmak, oraingoan buruz, kanpokoen hirugarrena egin du. Eta, atsedenaldia iritsi baino lehen, aurrelariaren hat-tricka falta jaurtiketa izugarri batekin. Geldiezina.

Kanpokoen nagusitasunak aldageletatik igaro ondoren jarraitu du. Paralluelok bosgarrena lortu du, bere laugarrena, abantaila handitzeko Battleko erdiraketa baten ondoren. Grahamek seigarrena egin du handik gutxira, area barruan erremate gurutzatu batekin definitu ondoren. Txuri-urdinek apur bat luzatzea lortu dute eta horietako batean Jacquelinek oso gertu izan du gola eskuinkada batekin, baina Cata Collek arriskua urrundu du. Alexiak, geldikako jokaldi batean, zazpigarrena egin du. Amaiurrek ohorezko golarekin itxi du partida, area kanpotik egindako jaurtiketa bikain baten ondorioz.

Porrota FC Barcelona geldiezinaren aurka. Hemendik aurrera, asteazkenean Reale Arenan Atletico de Madriden aurka jokatuko den hitzordu historikoan pentsatzera. Erreginaren Kopako gure bigarren finala bilatuko dugu. We are Real!

Fitxa teknikoa:

Real Sociedad: Lete, H. Uranga, Etxezarreta, Tejada (kap.), Vanegas (Amaiur, min. 66), Izarne, I. Arnaiz (Lorena, min. 78), E. Guridi, Jacqueline, Cecilia (Emma, min. 78) eta Mirari (N. Eizagirre, min. 78).

FC Barcelona: Cata Coll, Bronze, Martina, Paredes (kap.) (Marta, min. 74), O. Battle (Rolfo, min. 67), Walsh, Mariona (Alexia, min. 67), Graham, Vicky, Paralluelo (Bruana, min. 67) eta Brugts (Pina, min. 74).

Golak: 0-1: Vicky, min. 15; 0-2: Paralluelo, min. 22; 0-3: Paralluelo, min. 24; 0-4: Paralluelo, min. 44; 0-5: Paralluelo, min. 51; 0-6: Graham, min. 57; 0-7: Alexia, min. 81; 1-7: Amaiur, min. 82.

Epailea: Firvida Fernandez. Txartel horia erakutsi dio kanpoko Paredesi.