Atletismoa

Taldea

Aire zabaleko ranking-a Pista estaliko ranking-a Emakume atletak

Historia

Jatorria

Esan daiteke atletismoa Gipuzkoan 1914. Urteko uztailaren 31an jaio zela aurreneko aldiz Altzan (Jolastokietan) festibal atletiko bat ospatu zenean. Txapelketa horretan, Realeko atleten parte hartzea egon zen. Realeko atleten lehenengo argazkia 1916. urtekoa da, eta bertan taldeko kirolariak agertzen dira Realeko kamisetarekin. Realeko atletismoko sailak, beraz, mende bateko historia du eta Gipuzkoako Federazioa sortu baino lehen jaio zen. Nahiz eta ziurtasun osoa ez izan, baliteke kluba fundatu zen urtean (1909. urteko irailaren 7an) atletak egotea. Garai horretan elkarteetan normala zen kirol guztietan aritzea.

1916an Gipuzkoako Atletismoko Federazioa sortu zenean CD Fortunaren instalazioetan, bertara hurbildu ziren urte horretan lurraldean existitzen bederatzi taldeen ordezkariak. Horietako bat Reala zen, gaur egun arte etenik gabe existitu dena.

Atleta olinpiko zein internazionalak

Realeko atletismo sailetik atleta olinpiko asko pasa dira. Horietatik zazpik, elastiko txuri-urdina zeramaten Joko Olinpikoetarako deituak izan zirenean: Diego Ordoñez (Paris 1924 eta Amsterdam 1928), Felix Mendizabal (Paris 1924), Jose Luis Falcon (Erroma 1960), Fernando Aguilar (Tokio 1964), Ramon Cid (Montreal 1976 eta Mosku 1980; Cidek, gainera, Duisburgon

1973. urtean ospatutako Europako Junior Txapelketan bigarren lekua lortu zuen), Juan Jose Prado (Seul 1988), Mikel Odriozola (Sidney 2000, Pekin 2008 eta Londres 2012; Odriozola, gainera, zazpi Munduko Txapelketetan aritu da eta baita lau Europako Txapelketetan. Bitan izan da 50 km martxako Munduko Kopan laugarren)

Joko Olinpikoez gain, sailak atleta internacional asko izan ditu kategoria ezberdinetan. Gaur egun, Espainiako elastikoa janzten duten atletak daude, esate baterako, Odei Jainaga eta Iraitz Arrospide.

Gertaera esanguratsuak

1917. urtean, Atotxan ospatu zen Espainiako Txapelketan, Realeko atletek parte hartu zuten. Esate baterako, Jose Luis Eloseguik Espainiako errekorra eskuratu zuen altuera jauzian. Aurreneko urte hauetan, esanguratsua izan zen Felix Mendizabal eta Diego Ordoñezek lortu zutena, Pariseko (1924) Joko Olinpikoetarako sailkatu baitziren. Eta ez bakarrik hori. Diego Ordoñez, Felix Mendizabal, Jose Luis Elosegui eta Roberto Ordoñezek 4x100 metrotako erreleboan Espainiako errekorra erdietsi zuten.

Taldeka ospatu zen Espainiako aurreneko Txapelketan (1934), txuri-urdinak bederatzigarren lekuan sailkatu ziren. 1967. urtean, gloria handieneko unea iritsi zen sailarentzako. Urte hartan, Realeko atletak Valladoliden Espainiako txapeldunak izan ziren, UD Salamanca eta FC Barcelonaren aurretik sailkatuz. Orain arte lortu den titulu bakarra da. Hala ere, askotan lortu dira bigarren zein hirugarren postuak.

Gehiago irakurri

1970-1971 denboraldian, talde jubenilak estatu mailako bigarren lekua lortu zuen. Sailak, gainera, krossean tradizio handia izan du eta garrantzi handiko atletak taldetik pasa dira: Fernando Aguilar eta Arantxa Vega (emakumezkoetan eta krossean aurreneko Espainiako txapelduna izan zen), adibidez.

Gaur egun ere, Euskadiko atleta hoberenak talde txuri-urdinean daude eta saileko kirolari batzuk Espainiako selekzioarekin aritzen dira aldizka, bai beheko kategorietan eta baita selekzio absolutuarekin. 2014tik Realak atletismo eskola berritu bat du, non kirol hau sustatzen da txikien artean. Sailaren etorkizuna, beraz, bermatua dago. Sekzioak Gipuzkoako lehen mailako klub filialekin lan egiten du, CD Eibar, Jakintza edo Txindoki bezala.

Emakumezkoen atletismoa

Realeko atletismo sailean garrantzi handiko emakumeak egon dira historian zehar. Hiru etapa bereizi daitezke.

Aurreneko garaia 1960 eta 1970eko hamarkadetan eman zen. 1963. urtean parte hartu zuten txapelketetan talde txuri-urdineko lehenengo atletek. Alicia Gomez izan zen abuztuaren 3an lehena. Guztira, denboraldi hartan hamahiru neskek Realaren elastikoa jantzi zuten eta horietatik hiruk Montjuic-en ospatu zen Espainiako Txapelketan parte hartu zuten. Aurreneko etapa honetan, (1963. urtetik 1977. urteraino), Arantxa Vega izan zen sari gehien lortu zituena. Krosseko lehen Espainiako txapelduna izateaz gain, Vegak pista estaliko lehenengo Espainiako Txapelketan 500 metrotan eskuratu zuen urrezko domina (1965). Urte horretan, Espainiako errekorra lortu zuen 800 metrotan (2:21.4). Arantza Vega, Maria Lezaun, Ivonne Bertrand, Eli Apalategui eta Marivi Tarantinoren eskutik, guztira, hamar domina lortu zituzten Espainiako Txapelketetan, orain arte lortu diren guztiak.

Bigarren etapa motza izan zen eta soilik zortzi atleta pasa ziren Realetik. 1989. urtean hasi zen eta 1992an amaitu zen. Ainhoa Palacios eta Lorea Anabitarte izan ziren garai honetako atletarik esanguratsuenak. Azkenik, 2015. urtean, atletismo eskolako berrikuntzari esker, hainbat neska Realarekin entrenatzen daude. Realeko atletismo eskola adin guztietako neska eta mutilentzat dago irekia. Horren ondorioz, espero da hurrengo urteetan nesken kopurua handitzea.

*Argazkiak: Real Sociedad, Jaunsar, A.Alonso, Fototeca Kutxa

Ikasi eta gozatu atletismo eskolan!

Dibertsioa, balioak eta kirol ugari. Realaren atletismo eskolak handitzen jarraitzen du denboraldi batetik bestera. Kirol hau egin nahi baduzu eta ondo pasatu, eman izena eta ikasi titulua eta esperientzia luzea daukaten monitore eta entrenatzaileekin. Eskola, berez, adinaren arabera banatutako lau taldek osatzen dute (benjaminak, kimuak, haurrak eta kadeteak-gazteak); hala, errespetatu egiten dira garapen motorraren, hazkundearen eta heltzearen fase sentikorrak. Saioak arratsaldez izaten dira Anoetako Miniestadioan. Izena eman nahi baduzu edo informazio gehiago eskatu, jar zaitez gurekin harremanetan e-mail honen bidez: [email protected]. Aprobetxatu aukera!