Zubietak kolore polita hartu du Amets Batekin. Udaberriko goiz hotz honetan, hiru ikastetxeko 164 txikik (Elgoibar Ikastola, Donostiako San Luis Ikastola eta Irungo Belaskoenean Ikastetxea) gozatu ederra hartu dute Real Sociedad Fundazioak antolatzen duen ekimen polit honetan.
Goiz-goizean etorri dira eta Zubietako bazter guztiak ezagutu dituzte Realeko begiraleen eskutik. Futbolean aritu dira, hainbat joko egin eta, ondoren, lehen taldearen entrenamendua ikusi eta jokalariei animoak ematen aritu dira. Hori amaitutakoan, momentu politena beraientzat. Theo eta Sandra Ramajo jokalariekin solasalditxoa izateko aukera izan dute, baita argazki eta sinadurak lortzeko ere, nola ez.
Egun polita, arratsaldean borobildutakoa Donostiako Aquariuma bisita eginez. Aquariuma gure fundazioaren babeslea da. Igandean ekintzaren azken urratsa beteko dute. Anoetan izango dira Reala eta Sevilla FC partidan bere bihotzeko taldea animatuz.
