Asier Illarramendik Reala utziko du denboraldi hau amaitzean. Mutrikuko futbolaria hedabideen aurrean agertuko da gaur goizean, 11:30ean, Reale Arenako prentsa aretoan.
Hamaika urterekin sartu zen Zubietan. Ederto jokatzen zuen ilehori txiki hura heldu egin zen eta hazten ikusi genuen. Urratsez urrats, etapaz etapa, denak itsutuz bere apaltasunarekin, bai zelai barruan bai kanpoan. Azken hamarkadan bizitako unerik onenetako askoren protagonista, Asierrek 251 partida ofizial ditu gaiean orain arte, eta momentu paregabe bat beti txuri-urdinen historian geratuko dena: Errege Kopa Sevillako zerura altxatzea. Herren eta finala jokatu ezinik egin zuen, baina une horrek betiereko bihurtu zuen. Bere irudia garaikurra jasotzen, bezperan isuritako malko guztien ondoren, zale guztiok inoiz ahaztuko ez ditugun une ikoniko horietakoa da.
Illarrak azken hamarkadetako Real onena utziko du. Neurri handi batean, hamaika urte hauetan lehen taldeko kide gisa taldeari egindako ekarpenari esker izan da Reala hain handi. Lesioak gainditu ditu eta oso maila altua eskaini du. Zubieta izaera du. ‘Made in Gipuzkoa’ da. Klubaren alde egindako guztia eskertzea eta ahalik eta agurrik onena ematea besterik ez zaigu geratzen. Hamar egun barru, Reale Arenan, Sevillaren aurka, eta, ea, dagoeneko Txapeldunen Liga poltsikoan dugula, eztarria utzi dezagun oihu eginez: “¡Axi, Axi!