Reala martxan ipini da. Gipuzkoarrak lanera itzuli dira merezitako udako oporren ostean. Atseden hartzeko eta pilak kargatzeko aprobetxatu dute, ikastaro eder baina, aldi berean, oso zorrotz bati begira.
Hasierako besarkadak eta agurrak hainbeste denbora ikusi gabe egon ostean, txuri-urdinek, COVID probak egin ondoren, motzez jantzi dira Zubietako Jose Luis Orbegozo zelaiko berdegunera salto egiteko eta bost aste eta erdiz luzatuko den aurredenboraldiko lehen entrenamenduarekin hasteko. Zerumugan, abuztuaren erdialdean, Camp Nouko norgehiagoka, 21-22 denboraldiari hasiera emango diona. Liga, Errege Kopa eta Europa Liga izango dira txuri-urdinen erronkak aurten.
'Olinpikoak '(Oyarzabal, Merino, Zubimendi eta Sagnan), Isak, hilaren 26an itzuliko dena, eta Silvaren faltarekin, arrazoi pertsonalak tarteko, Imanol Alguacilen taldeak lehen entrenamendua osatu du, ariketa fisikoak eta baloiarekin egindako lana uztartuz. Bihar, 10:30ean, entrenamendu berria.