Minutuak batzen

Bigarren taldeak denboraldiaurreko beste lagunarteko bat jokatu du arratsalde honetan Areition, Eibar Bren aurka. Aitor Resendek talde oso gazte baten aldeko apustua egin du berriro, azken asteetako lanari jarraipena emanez eta beheko mailetako jokalariei minutuak eskainiz.

Partidak lehen minututik estutu ditu txuri-urdinak. Eibarrek hartu du jokoaren ekimena lehen zatiko minutu askotan, eta Aitor Resenderen taldea bere zelaian defendatzera behartu du. Defentsan aritzeko ariketa ona izan da realistentzat: ordenari eutsi, aurkariaren erasoei aurre egin eta euren uneak aprobetxatzen saiatu behar izan dute; denboraldi honetan Lehen Federazioa bezalako maila zorrotz batean ere aurkituko dituzten egoerak.

Ordu erdia igarota iritsi da partidako lehen kolpea. Trantsizio azkar batean, Eibarrek donostiarren defentsaren bizkarra ondo aurkitu du eta, bigarren zutoinera egindako erdiraketaren ostean, jokalari armagin batek lehen ukituan baloia sarera bidali du, 1-0ekoa eginez.

Bigarren zatian, partidaren joera ez da gehiegi aldatu. Txuri-urdinek lanean eta lehiatzen jarraitu dute, baina etxekoek beste lau gol egin dituzte, azken emaitza handituz. Emaitzatik harago, neurketa baliagarria izan da talde gazte honentzat, maila handiko aurkari baten aurrean lehiatu eta esperientzia pilatzen jarraitzeko.

Euskal Herria Kopa B izango dute hurrengo hitzordua. Txuri-urdinek datorren asteburuan jokatuko dute txapelketa, Zizurkilen, denboraldia prestatzen jarraitzeko beste aukera on batean.