Porrota azken minutuan

Realak bere emaitza bolada ona moztua ikusi du Villarealen aurka 2-3 galduta arratsalde honetan Anoetan. Neurketa parekatua egon da, baina kanpokoen eraginkortasun handiagoak balantza bere alde jarri du. Azken minutuan porrot gogorra jaso dute gure jokalariek, esfortzu handia egin eta 0-2koa berdindu ondoren.

Txuri-urdinak baloiaren jabe izan dira eta sentsazio onak eskaini dituzte. Kubok, bakarkako jokaldi batean, Junior jarri du proban, behetik egindako jaurtiketa batekin. Kanpokoak ez dira Remiroren atera hurbildu, baina bere lehen abagune arriskutsuan, ordu erdia pasata, Ayozeren gol batekin aurreratu dira. Antzeko beste ekintza batean, minutu batzuk geroago, Gerardek ez du asmatu. Realak berdinketa lortu nahi izan du atsedenaldira iritsi aurretik eta gertu egon da, batez ere Aritzen burukada batekin, baina Juniorrek ondo urrundu du.

Bigarren zatia hasi eta berehala aurkariak abantaila bikoiztu du Moleiroren golari esker, baina txuri-urdinek ondo erantzun dute eta aldea murriztu dute Solerren eskuinkada batekin. Realak berdinketa bilatu du eta atezainak Guedesen berdinketa saihestu du jaurtiketa desbideratuz. Handik gutxira, Barrenek partida berdindu du falta jaurtiketa zoragarri batekin. Donostiarrak, konfiantzaz, garaipenaren bila joan dira, baina norgehiagokako azken jokaldian, Moleirok kanpoko taldearentzat hirugarren gola sartu du eta taldea punturik gabe geratu da lan bikaina egin ostean. Kolpe gogorra.

Azken asteetako igoera txuri-urdina geldiarazten duen porrot mingarria. Orain txipa aldatu eta Errege Kopari aurre egin behar zaio. Asteazkenean izango da, Reusen.

Fitxa teknikoa:

Real Sociedad: Remiro, Aramburu, Aritz (kap), Martín, Sergio Gómez, Gorrotxa, Soler (Zakharyan, min.77), Brais Méndez (Goti, min.84), Take (Turrientes, min.84), Guedes (Carrera, min.77) eta Sadiq (Barrene, min.56).

Villarreal CF: Júnior, Mourinho, Foyth, Rafa Marín, Pedraza (Cardona, min.78), Comesaña, Gueye (Parejo, min.69), Buchanan (Akhomach, min.78), Moleiro, Ayoze (Oluwseyi, min.86) eta Gerard (kap)(Mikautadze, min.69).

Golak: 0-1: Ayoze, min.31. 0-2: Moleiro, min.57. 1-2: Soler, min.60. 2-2: Barrene, min.87. 2-3: Moleiro, min.95.

Epailea: Cesar Soto. Txartel horia atera die etxeko Sadiq, Martín eta Barreneri eta kanpoko Gueye, Ayoze, Moleiro, Pedraza, Mourinho, Júnior eta Foythi.

Ikusle kopurua: 30.142 pertsona.