Gure belar hockeyko taldeak garaipen oso garrantzitsua lortu du SPV Complutenseren aurka ligako azken-aurreko jardunaldian bi eta bateko emaitzarekin. Partida oso goiz jarri da alde Emilia Garcia Munitisen golari esker. Hortik aurrera madrildarren nagusitasuna nabaria izan da eta, atsedenaldia iritsi baino lehen, Julieta Baglionik norgehiagoka berdintzea lortu du korner penalti batean aldaratze bat baliatuta.
Txuri-urdinek partida osoan zehar defentsan egindako lana goraipagarria izan da hirugarren sailkatuaren eta ligako talde onenetako baten aurka. Eta amaierarako hamahiru minuturen faltan, donostiarrek bigarren eta behin betiko gola lortu dute, Veronika Decsyovaren bidetik, talde osoaren lana eta ahalegina sarituta. Jaitsiera postuetatik atera eta jaitsiera zuzena saihesteko balio duten hiru puntu oso garrantzitsu. Azken jardunaldian RC Jolaseta izango dute aurkari, azken sailkatua, salbazioa ziurtatzeko beste garaipen baten bila, jardunaldiko gainerako emaitzen zain. Atxurrak gora!