Landutako puntua

Sansek landutako puntua lortu du Burgos CF taldearen aurka. Markagailuan bi aldiz atzetik joan arren, berdintzeko gai izan da eta irabazteko aukerak izan ditu gipuzkoar taldeak.

Sansek ondo ekin dio neurketari eta lehen minutuetan izan du gola eskuratzeko aukera. Dani Díazen korner baten ondoren, Carreraren burukada zutoinera joan da. Handik gutxira, epailea VARera joan da Agoteren ustezko esku baten ondorioz. Berrikuspen labur baten ostean, zalantza ugari sortu dituen penaltia adierazi du. Currok penaltia aprobetxatu eta arerioaren lehen gola egin du. Hala ere, Zubietakoek berehala erreakzionatu eta berdinketa bilatu dute. Ordu erdia igarota, Carrera bakarrik geratu da atezainaren aurrean, baina bere jaurtiketa kanpora joan da. Bi minutu baino ez dira igaro markagailua orekatu duenean: Burgosek kornerra atera ostean, trantsizio azkarrean, Dani Díazek zelai osoa zeharkatu du eta aurrelariari oparitu dio gola. Oraingoan, Carrerak ez du barkatu eta atezaina gainditu du 1-1ekoa jartzeko atsedenaldira iritsi aurretik.

Atsedenaldiaren ostean, Aguirrek lehen saiakera egin du area kanpotik ezkerrez egindako jaurtiketa batekin, baina etxeko atezainak gelditu egin du. Minutu gutxira Burgosek berriro gola egin du markagailuan aurrea hartzeko. Forések urrutitik egindako jaurtiketa baten aldaratzea baliatu eta etxekoen bigarrena sartu du. Sansek berehala erantzun du eta Gorosabelek neurketa berdindu du korner baten ondoren egindako burukada baten bidez. Berdinketarekin, bi taldeek hirugarren golaren bila jarraitu dute azken txanpan, baina ez dute abagune argirik sortu. Etengabe saiatu arren, markagailua ez da berriro mugitu El Plantíon.

Berdinketa baliotsua eskuratu du talde donostiarrak, beti bezala lehiakor azalduz. Larunbatean erronka berria izango du etxean CD Teneriferen aurka. Gehiagoren bila. Aupa Sanse!

Fitxa teknikoa:

Burgos CF: Cantero, Dadie, Sergio Glez., Grego S., I. Vilarrasa (Brais M., min.61), Galdames, Gragera (Marcelo, min.76), David G., Javi Llabrés (Fermín, min.61), Curro (kap.) (Karrikaburu, min.76) eta A. Forés (Mollejo, min.68).

Sanse: Fraga, Garro, Balda (kap.), Kita, Agote, Aguirre (Carbonell, min.70), Lebarbier (Eceizabarrena, min.82), Díaz (Mariezkurrena, min.70), Gorosabel (Adjabeng, min.82), Astiazaran eta Carrera (Soroeta, min.90+3).

Golak: 1-0: Curro, min.13. 1-1: Carrera, min.38. 2-1: A. Forés, min.57. 2-2: Gorosabel, min.64.

Epailea: Iosu Galech. Txartel horia erakutsi die etxeko Sergio Glez.-i eta kanpoko Astiazaran eta Baldari.