Maila handiko erronka Zubietan

Realak FC Barcelona hartuko du igande honetan (12:00), nazioarteko etenaldiaren ostean Liga Fra itzuliko den neurketan.

Realeko emakumezkoen lehen taldeak igande honetan ekingo dio berriro ligako lehiari, denboraldiko neurketarik zorrotzenetako batekin. Txuri-urdinek FC Barcelona hartuko dute Zubietan, 12:00etatik aurrera, Europako futbolaren erreferente nagusietako baten aurka indarrak neurtzeko aukera berri batean.

Nazioarteko etenaldiaren ostean, donostiarrak Valentziaren aurka etxetik kanpo lortutako azken garaipenak utzitako sentsazio onei jarraipena emateko gogoz itzuliko dira lehiara. Gorka Álvarezen taldeak aurkariaren maila eta neurketaren zailtasuna ondo ezagutzen ditu, baina ahalik eta mailarik onenean lehiatzeko eta zaleen aurrean sendo agertzeko asmoz zelairatuko da.

Aurrean FC Barcelona izango dute, txuri-urdinen sendotasuna, kontzentrazioa eta talde-lana berriro ere proban jarriko dituen aurkaria. Realistek, gainera, oroitzapen bikaina dute talde blaugranaren azken bisitaz. 

Zubieta, beraz, futbol goiz bikain batez gozatzeko prest dago. Maila handiko neurketa izango da, eta zaleen babesa ezinbestekoa izango da txuri-urdinek erronka berri honi aurre egiteko.