Saririk gabe

Sansek 1-0 galdu du gaur arratsaldean Gran Canaria Zelaian UD Las Palmasen aurka. Donostiarrek berdinketa lortzeko jokaldiak izan dituzte, baina kanariarren gol goiztiarrak erabaki du neurketa, txuri-urdinek amaierara arte berdinketaren bila jarraitu duten arren.

Etxekoak hobeto hasi dira lehen zatian, eta neurketa hasi eta minutu gutxira, Jesék aurretik jarri ditu kanariarrak, donostiarren defentsak baloia urrundu ondoren area barruan geratutako aldaratzea aprobetxatuz. Sergio Vierak bigarrena sartzeko abagunea izan du area kanpotik egindako jaurtiketa indartsu batekin, baina baloiak zutoinean jo du. Gure bigarren taldea erantzuten saiatu da, eta sakontasuna bilatu du hegaletatik, Marchalen eta Dani Díazen bidez. Hain zuzen ere, Díaz berdinketa lortzetik gertu egon da urrutitik egindako jaurtiketa indartsu batekin, baina baloia langara bidali du. Hurrengo jokaldian bertan, Danik erdiraketa ona jarri dio Carrerari, baina haren erremateak zutoinean jo du. Gorosabel aldaratzea aprobetxatzeko gertu egon da, baina Carok geldiketa bikaina egin du gola eragozteko. Gipuzkoarrak aurkariak baino joko hobea erakutsita, baina markagailuan atzetik iritsi dira atsedenaldira.

Bigarren zatia lehenengoa amaitu den bezala hasi da, txuri-urdinak erasora jota. Atsedenaldiaren ostean zelairatutako Astiazaranek bi gol aukera izan ditu. Lehenengo errematea kanpora joan da, eta bigarrena etxekoen defentsak urrundu du. Bi taldeek abagune gutxiago sortu dituzte ondoren, eta ez da iritsiera argirik izan bigarren zatiaren azken txanpara arte. Etxekoen aldetik, Pezzolesik beste baloi bat bidali du zurtoinera. Sansek, hala ere, berdinketaren bila jarraitu du amaierara arte. Díazen erdiraketa bikain baten ondoren, Astiazaranen burukada oso gutxigatik joan da kanpora. Azken minutuetan, Iker Calderónek beste aukera bat izan du markagailua berdintzeko, Jon Eceizabarrenak ateratako korner baten ondoren oso gertutik egindako burukada batekin, baina baloia kanpora joan da.

Saririk ez Kanaria Handiko Las Palmasen gipuzkoarrentzat, puntu bat edo gehiago lortzeko aukerak izan dituzten arren. Porrot honekin, txuri-urdinek jaitsiera postuetan jarraitzen dute. Datorren jardunaldian Gironaren aurka arituko dira Zubietan, egoerari buelta emateko asmoz. 

Fitxa teknikoa:

UD Las Palmas: J.A. Caro, Pezzolesi, Álex Suárez (kap.), Herzog, Bonfanti (A. Rodríguez, min. 31), Loiodice (Acimovic, min. 60), Sergio Viera (Bassinga, min. 76), Miyashiro (Elías, min. 60), Iván Jaime, Manu Fuster (Kirian, min. 60) eta Jesé.

Sanse: Olasagasti, Ruperez, Calderón, Kita, Balda (kap.), Carbonell (Eceizabarrena, min. 71), Aguirre (Lebarbier, min. 46), Díaz (Soroeta, min. 84), Marchal (Astiazaran, min. 46), Gorosabel (Mariezkurrena, min. 74) eta Carrera.

Gola: 1-0: Jesé, min. 8.

Epailea: Pablo Morales. Txartel horia atera die etxeko Sergio Viera, Jesé eta Bassingari eta kanpoko Calderón, Ruperez eta Eceizabarrenari.