Joan den irailaren 21ean deialdia itxi eta gero, Sport Thinkers Smart Stadium lehiaketan finalista geratu diren 25 enpresen izenak jakinarazi dira; Global Sports Innovation Center powered by Microsoft da antolatzailea, eta Real Sociedad SAD eta Microsoft laguntzaileak. Oinarri teknologikoko enpresen lehiaketaren helburua da Anoetako estadioaren eraldaketa digitala bultzatuko duten ekintzak egitea, gaur egun berritze prozesu betean sartuta dagoelarik.
Lehiaketaren finalera iritsi diren enpresak 7 herrialdetakoak dira - Australia, Espainia, Frantzia, Finlandia, Hungaria, Italia, Herbehereak – eta soluzio teknologiko berritzaileak eskaintzen dituzte, Realari laguntzeko zaleekin are gehiago konektatzen eta estadioaren segurtasuna zein jasangarritasuna hobetzen. Teknologien oinarrian daude adimen artifiziala, datuak analizatzeko tresnak, zuzeneko emanaldiak, errealitate birtuala eta robotika, eta horietako batzuk aukeratu zituen GSICek eta Realak enpresa parte hartzaileak ebaluatzeko prozesuan.
25 finalistak dira: Solos (Australia), Pressenger (Hungaria), Macco Robotics (Espainia), Cinfo (Espainia), Karma Technologies (Espainia), Batura Mobile Solutions (Espainia), Valorafutbol (Espainia), Brintia (Espainia), Imascono (Espainia), Virtual Soccer Zone by Orwell VR (Italia), Iristrace (Espainia), Content Stadium (Herbehereak), Yerba Buena VR (Estatu Batuak), iXpole (Espainia), NFCSound (Herbehereak), Vidibond (Espainia), Open Camp (Espainia), BCaster (Finlandia), Yarr TV (Espainia), WIMy (Espainia), Synky BV (Herbehereak), Myruns Technology (Espainia), Deep Data (Espainia), IMMERSIA Data Visualization (Espainia), Digifood (Frantzia).
Iris Cordoba da GSICeko zuzendari nagusia, eta, adierazi duenez, “Zentroa ireki zenetik nazioarteko hainbat norgehiagokotan parte hartu eta lagundu dugu, eta 1.500 enpresa desberdin ezagutzeko aukera izan dugu. Beraz, gure iritziz, deialdia oso arrakastatsua izan da, bai izena eman dutenen kopuruagatik, bai aurkeztu diren soluzioengatik. Baloratu ditugu enpresa horiek Realari ekar diezazkioketen berrikuntza, proposamena eta balioa, baita gaur egungo merkatuan izan ditzaketen baldintzak edo presentzia, taldea osatzen duten profesionalen profila edo beraien garapenak Microsoft Sports plataforman integratzeko aukera. Oraingoan, Realaren eskutik lan egin dugu, soluzio interesgarriak dituzten 25 enpresa aukeratzeko, eta horiek ikusi eta entzuteko irrikaz gaude, 11 irabazleen hautaketa egiteko, beraien ekarpena egin ahal izan dezaten Anoeta estadio adimenduna izateko eraldaketan”.
Datorren urriaren 8, 9 eta 10ean, aukeratutako 25 taldeek telematikoki egingo dituzte beren aurkezpenak GSICeko, Realeko eta Microsofteko ordezkariek osatutako epaimahaiaren aurrean. Lehiaketaren 11 irabazleek Donostiaraino bidaiatuko dute azaroan, bertan astebete bat emateko Realarekin. Enpresek hurbiletik ezagutu ahal izango dituzte klubaren beraren zein estadioaren beharrak, beren soluzioak egokitu ahal izateko eta proposamen bat aurkezteko, klubeko zuzendariek baloratu dezaten Anoetan proba pilotu bat egiteko.