Tximist Cup-en baitan ospatu da ‘She Leads’ kongresuaren edizio berria, gogoetarako eta topaketarako gunea, non futbola tresna sozial eraldatzaile gisa aurkeztu den, emakumeen ahalduntzea eta lidergoa ardatz hartuta.
Tximist Fundazioak bultzatutako ekimen honek, Reala eta nazioarteko beste klub batzuen laguntzaz, kirolaren bidez etorkizuna eraikitzeko ikuspegi bera partekatzen duten emakume erreferenteak bildu ditu.
Albiste hau laguntzen duen bideoan ikus daitezke hainbat ibilbidetako emakumeen testigantzak, guztiak pasio eta konpromiso komun batek elkartzen dituenak. Garbiñe Etxeberria, Realeko emakumezkoen futbolaren arduradunak, klubaren oinarrizko lanaz eta belaunaldi berrientzako erreferenteak sortzearen garrantziaz hitz egiten du. Aintzane Encinas, Tximist Fundazioaren zuzendariak, azpimarratzen du kirolak berdintasunaren eta aukeren espazio izan behar duela, mugarik gabe.
Afrikatik, Irene Gonçalves, Angolako Futbol Federazioko presidenteordeak, ikuspegi berezi bat ekartzen du: Angolako bi jokalari ari dira egun hauetan Tximist Cup-en parte hartzen Realeko U17 taldearekin. Haientzat, esperientzia hau ez da lehiaketa hutsa: bizitza aldatzeko aukera bat da, aurretik existitzen ez zen bide bat irekitzen duena. Gonçalvesek azpimarratzen du halako lankidetzek futbol femenino globalago eta bidezkoago bat eraikitzeko duten garrantzia.
Georgie Donnelly, Manchester Cityko entrenatzaileak, kluben erantzukizuna nabarmendu du, baita egitura inklusibo eta horizontalen aldeko apustua ere, baloiarekin amets egiten duen neska bakoitzak bere tokia izan dezan.
‘She Leads’ ezinbesteko gune bilakatu da: kirolaren emozioa konpromiso sozialarekin eta gogoeta kritikoarekin uztartzen den tokia. Bertan emakumeen ahotsak ozen entzuten dira, eta kirolaren, hezkuntzaren eta inspirazioaren bidez emakumeen arteko sare global bat ehuntzen da.
Futbolak ez du mundua bere kabuz aldatzen. Baina bizitzak alda ditzake. Eta hori, berez, iraultza bat da.
