Belar hockeyko gure taldeak zazpi eta bat irabazi dio FC Barcelonari gaur eguerdian Zubietan. Txuri-urdinak garaipen sendo batekin itzuli dira geldialditik. Nahiz eta katalanak aurretik jarri diren zoritxarreko gol batekin, donostiarrek markagailua irauli dute Lara Pampinek bi aldiz eta Laura Garatek egindako golei esker, atsedenaldira bi goleko abantailarekin iristeko.
Gipuzkoarrek maila berean jarraitu dute hirugarren laurdenean eta hiru gol gehiago egin dituzte Laura Garate, Sara Puglisi eta Julene Sanchezen eskutik. Azken laurdenean, Puglisik beste gol bat egin du eta neurketa 7-1arekin amaitu da. Horrela, Realak garaipen handia lortu du lehiaketara itzuleran hiru hilabeteren ondoren eta sailkapeneko bosgarren postura igo da. Datorren astean UD Taburiente bisitatuko dute hasiera onari jarraipena emateko asmoarekin. Atxurrak gora!