Gaur goizean eman zaio hasiera Walking Football proiektuari. Real Sociedad Fundazioaren ekimena da, eta berrogeita hamabost urtetik gorako pertsonengan bizimodu aktibo eta osasungarria sustatzea du helburu
Zubietako instalazioek hartu dute lehen entrenamendu hau, eta Bixio Gorriz eta Mitxel Loinaz beteranoekin batera, hogei bat parte-hartzaile bertaratu dira, kirola modu lasai eta dibertigarrian eginez gozatzeko asmoz. Walking Football futbol modalitate bat da, bizimodu aktiboa mantentzen eta ondo pasatzen laguntzeko diseinatua. Futbolean jokatzean datza, baina aldaketa batzuekin: oinez jokatzen da, kontaktua saihesten da eta ezin da baloia buruaren gainetik altxatu, besteak beste. Realeko entrenatzaile batek gidatuta, ordubeteko ariketa atsegina egin dute lehen egun honetan.
Zubietan ez ezik, Arrasaten eta Beasainen ere egingo da Walking Football, astean behin entrenamenduak eginez. Real Sociedad Fundazioaren proiektu honek Adinberri, Donostia Lagunkoia, Matia, Adinkide, Agujipens (Gipuzkoako jubilatu eta pentsiodunen elkartea), Arrasateko Udala eta Beasaingo Udalaren babesa du.
Kirola egiteko beste modu batez gozatu nahi duten 55 urtetik gorako pertsona guztiek Walking Footballen izena eman ahal izango dute esteka honen bidez: https://forms.office.com/r/Li5WvbtaLC. Arrasateko eta Beasaingo kiroldegietan ere izena emateko orriak egongo dira.
Zalantzarik izanez gero, [email protected] helbidean edo 943 46 28 33 telefonoan argitu daitezke.
