Gogorregia

Gure bigarren taldeak ezin izan du punturik batu gaur goizean Zubietan Levanteren aurka (1-4), txuri-urdinek gehiago merezi izan duten norgehiaoka batean, 50 minutu baino gehiago jokalari bat gutxiagorekin aritu diren arren.

Partida oso parekatsu hasi da. Kanpoko taldeak jokoaren kontrola edukitzen saiatu da, baina ez du aukera argirik sortu, Bascuk egindako urruneko jaurtiketa bat izan ezik, Mendiburuk kornerrera bidali duena. Txuri-urdinen erantzuna Etxeberriaren abagune batekin iritsi da. Zelai erditik ateratako falta batean egindako errematatea zutoinarekin aurkitu da. Hala ere, 34. minutuan norgehiagokaren norabidea aldatu duen jokaldia iritsi da. Mendiburuk Dana lurrera bota du defentsa donostiarra bizkarretik gailentzea lortu duen pase baten ondoren, eta epaileak etxeko atezaina kanporatzea erabaki du. Levantek ez du falta horretan bertan markagailuan aurrea hartzea lortu, baina handik gutxira, Ariasek hegaletik egindako erdiraketa bat baliatuta buruz errematatu eta abantaila lortu dute.

Bigarren zatian, jokalari bat gutxiagorekin aritu arren, gipuzkoarrak askoz hobeto zelairatu dira. Baloia azkar mugituz, aurkariaren atera iristen hasi dira eta, 58. minutuan, Etxeberriak egindako jokaldi bikain baten ostean, Murillok sareetara bidali du baloia markagailua berdintzeko. Gure bigarren taldeak borrokan jarraitu du, eta gertu izan du bigarren gola, kanpoko taldeak defentsan zalantza egin duen jokaldi batean. Hala ere, jokaldi horrek valentziarrak esnatu egin ditu, eta azken minutuetan erasoan duten sendotasuna erakutsi dute. Arias izan da berriro protagonista; lehenik, etxeko defentsak bizkarrean utzitako hutsunea baliatuz, eta ondoren, hegaletik egindako erdiraketa bat errematatuz aldea handitzeko. Gainera, Alharillak laugarren gola sartu du Levanterentzat partida amaitzeko minutu gutxi falta zirela.

Porrota lehiaketako liderraren aurka, donostiarrek egindako esfortzu eta lan handiagatik gehiago merezi izan duten arren. Sentsazio onekin geratu eta hurrengo neurketan pentsatzeko garaia da datorren astean Osasuna hartuko baitute berriro Zubietan.