'GUazen KOPAREKIN' erakusketaren gaineko ohar argigarria

Hilaren 19an ‘GUazen KOPAREKIN’ erakusketa irekitzea aurreikusita dagoela-eta, Realak ekimen horrekin lotutako hainbat gauza argitu nahi ditu. 

Anoeta Estadioan duela hainbat astetik egiten ari diren hobekuntza eta lanengatik, ezinezkoa da uda honetan estadio barrutik ohiko ibilbidea egitea. Horregatik, eta gure zaleei esperientzia erakargarria eskaintzen jarraitzeko, Klubak ibilbidea egiten jarraitzea ahalbidetzen duen proposamen alternatibo bat diseinatu du, egungo egoerara egokitutako formatu batean, nahiz eta jatorrizko tourrarekiko prezio nahiko murriztuak izan. 

‘GUazen KOPAREKIN’ gure historiako kirol mugarri handien erakusketa bat da, eta, bereziki, La Cartujan lortutako azken-azken tituluarena. Hala ere, erakusketan aurretik lortutako lau Kopak ere erakutsiko dira, Ligako eta Superkopako titulu historikoekin batera, gure historiako arrakasta handienetako batzuen ikuspegi orokorra eskainita. 

Ondare horrekin guztiarekin batera, joan den apirilaren 18an Sevillan eskuratutako Kopak ere leku nabarmena izango du, gure Klubaren kirol ondarea ospatzeko egindako proposamen zabalago baten barruan. Gainera, bisitariek garaikurraren ondoan argazki bat egin eta eraman ahal izango dute, oroigarri moduan, eta bisitan zehar argazkiak egiteko aukera ere izango dute. 

Kontuan hartuta erakusketan ezin izango dela estadioaren ohiko ibilbideko gune jakin batzuetara sartu, esaterako, aldageletara edo jokalekura, sarreraren prezioa egokitu egin da eskainitako esperientziarekin bat datorren tarifa bat bermatzeko.  

Era berean, bazkideekin egindako entzute aktiboko prozesuaren ondorioz, Klubak erabaki du, Anoetan egiten ari diren hobekuntza lanak amaitu ondoren eta, beraz, segurtasunak eta logistikak ahalbidetzen dutenean, espazio bat gaituko dela gure zaleek Koparekin argazki bat egin ahal dezaten, doan, baina ez erakusketaren barruan. 

Klubak ilusio handiarekin lan egin du proposamen honetan eta ziur gaude erakusketa oso esperientzia hunkigarria eta bisitatzen duten pertsona guztien gustukoa izango dela.