Hasiera besterik ez da

Ez da nahi genuen hasiera izan, argi dago. Realak AFC Bournemouthen aurka galdu du gaur gauean, UEFA Europa Leagueko lehen jardunaldian. Kanpokoen hasiera bikainak gainditu ditu txuri-urdinak eta, bigarren zatian asko estutu badute ere, berdinketa merezita, ezin izan dute punturik atera Europako estreinaldian.

Hasiera bizietara ohituta dagoen talde britainiarrak bere erritmoa ezarri du eta gipuzkoarrena baino hobea izan da. Kluivertek eta Rayanek lehen hogei minutuetan sartutako bi golek oso maldan gora jarri dute txuri-urdinen debuta. Kanpokoen lehen zatia aparta izan da. Golez gain, baloi bat zutoinera bidali dute. Reala erreakzionatzen saiatu da, baina maiatzean garaikurra altxatzeko hautagai argia dela erakutsi duen talde batekin egin du topo.

Bigarren zatian beste martxa bat sartu dute etxekoek, eta Sergio Gomezen erdiraketa bat sare barruan bukatu du berdinketan sinesteko. Guedesek markagailua iraultzea bilatu du Petrovicek ongi desbideratu duen jaurtiketa batean. Portugaldarrak eta Oyarzabalek, kontraeraso batean, aukera paregabea izan dute, baina ez dute asmatu. Matarazzoren mutilek erasotzen jarraitu dute eta berdinketa lortzeko aukerak izan dituzte. Sučićek erdiraketa bat jarri du, baina Orri ez da gutxigatik errematatzera iritsi. Oso iraulia zegoen Realak berdinketa erabat merezi izan du. Oskarssonek gertu eduki du gola bitan, baina bere erremateak Petrovicek gelditu ditu. Azkenean, eta behin eta berriro saiatu arren, ez da gehiagorako denborarik izan.

Europako faseari ekiteko porrota. Kanpokoen hasiera paregabeak neurketa erabaki du, eta Realak bigarren zatian berdinketa merezi izan duen arren, ezin izan du lortu. Bigarren jardunaldira arte itxaron beharko dute donostiarrek lehen puntuak batzeko.

Fitxa teknikoa:

Real Sociedad: Marrero, H. Fort (Guedes, min.46), Beitia, Martín, M. Sarr, Sergio Gómez, Turrientes (Gorrotxa, min.58), Herrera (Zakharyan, min. 84), Barrene (Take, min. 84), Oyarzabal (kap)(Sučić, min.74) eta Óskarsson.

AFC Bournemouth: Petrovic, Smith (kap)(Diakite, min.63), Hill, Silva, Truffert, Scott, Adams (Christie, min.63), Rayan (Doak, min.71), Tavernier, Kluivert (Brooks, min. 84) eta Evanilson (Álvaro, min.71).

Golak: 0-1: Kluivert, min.11. 0-2: Rayán, min.20. 1-2: Sergio Gómez, min.58.

Epailea: Paweł Raczkowski (Polonia). Txartel horia atera die etxeko Turrientes, Barrene eta Óskarssoni eta kanpoko Kluivert, Truffert eta Diakiteri.

Ikusle kopurua: 30.020 pertsona.