Inoiz imajinatu duzu Realeko historiko batek telefonoz dei diezazukeela?

Horixe gertatu zitzaien, hain zuzen ere, Isidoro, Josu, Juana, Leire eta beste batzuei aurreko ostegunean, Bixio Gorriz, Mitxel Loinaz eta Xabi Prietoren deiak jaso zituztenean Nagusilan elkarteak antolatu zuen eta Real Sociedad Fundazioa kolaboratzaile zen "Deien maratoia – Zilarrezko haria" ekitaldi solidarioan. Gure jokalari ohietako hiru, nahi gabeko bakardadean dauden pertsonekin harremanetan jarri ziren telefonoz, eta tarte atsegin bat partekatu zuten hainbat gairi buruz hitz egiten.

Bixio Gorrizek, bere aldetik, Zorroaga zentroan aurkitzen diren bi adineko pertsonekin hitz egin zuen telefonoz. Hizketaldian zehar, familiaren eta  Realaren iraganaren eta orainaren inguruan aritu ziren, eta Bixioren garaian jokalari erakargarriena nor izan zen ere eztabaidatu zuten. Elkarrekin goiz zoragarria igaro zuten eta gure gizartean gero eta presentzia handiagoa duen arazo bati aurre egiten lagundu zuten.