"Urte ahaztezina izan da niretzat"

Mikel Oyarzabalek denboraldi borobila amaitu du. Harrobiko jokalariak amaiera bikaina eman dio bere urteari espainiar selekzio absolutoarekin debuta eginda. Oraindik jubenil adinean, futbolariak hainabt laudorio jaso ditu bere ibilbide geldiezinagatik. Mikel, Real Sociedad TV-ri onartu dionez, “urte ahaztezina izan da, gauza asko pasa zaizkit denbora gutxian. Jubeniletan egotetik lehen taldera pasa naiz, golak sartu ditut,… Selekzioarekin debutak urte borobil bat itxi du”. Aurrelariak dena “lasaitasunez, naturaltasunez eta oinak lurrean edukita hartzen dut. Iritsi besterik ez naiz egin eta nire taldekideetatik ikasten jarraitu beharra dut”. Orain atseden hartzeko garaia da, pilak kargatu eta “ilusioz eta gogoz gainezka itzuli aurredenboraldiko lehen egunerako. Ahalik eta ondoen lan egin ondoren, kurtsoan zehar, dena ondo joan dakigun eta ahalik eta gorenen egoteko zaleei eta geure buruari poztasunak emateko”.