2014an Realaren alde fitxatu zuenetik, Maria Diaz jokalari garrantzitsu bihurtu da realzaleen aldagelan. CD Transportes Alcainetik iritsi zen, berarentzat denboraldi zirraragarri bat bizi ondoren, 19z beheko Europako Lehiaketan aritu eta txapeldunorde geratu baitzen, Nahikari Garcia eta Leire Baños taldekideekin batera. Nafarrak hegalean jokatzen du, nortasunarekin eta indartsu, eta baloia ongi erabiltzen du bi hankekin. Aurreko urtean neska kirolari gazteak saritzen dituen Futbol Draften “Urrezko Hamaikakoa” lortu zuen. LaLigak ere hautatu zuen 15-16 denboraldiko jokalaririk onenen artean.