Korner Jaialdiaren hirugarren ekitaldia Ernest Lluch Kultur Etxean izan zen atzo. Egungo Euskal Literatura eta Futbola Jon Kortzarrarek EHUn bultzatzen duen ikerketa proiektua da, futbolak gizartearekin dituen loturak hausnartzen dituena. Ikerketak hainbat genero eta autore aztertzen ditu, haien artean Harkaitz Cano eta Karmele Jaio, egungo euskal literaturaren bi izen nagusi. Biak futbolarekin duten harremanari buruz aritu ziren solasean.
Topaketa Juan Mari Irigoien Sanseko futbolari ohi eta idazleari egindako omenaldi hunkigarri batekin hasi zen. Juan Marik Korner jaialdia inauguratzeko ohorea izan zuen bere lehen edizioan eta Kornerren espiritua inork baino hobeto islatzen du: futbolaren eta kulturaren arteko harremana.
Kortazarrek moderatzaile lanak egin zituen eta 90 minutuko partida interesgarria bizitzeko zorian zeudela iragarri zuen.
Karmele Jaio izan zen hitza hartu zuen lehena. Zaleek futbol partidak emozioz eta pasioz beteta nola bizi dituzten hunkitzen jarraitzen duela partekatu zuen. Hala ere, benetan interesatzen zaiona emozio horiek liburuetan eta istorioetako protagonistetan islatzea da. Bere ikuspuntutik, literaturak eta futbolak harreman estua dute. Bai liburu bat idazteak bai partida bat prestatzeak estrategia eta kontakizun bat eskatzen dute.
Bestalde, Harkaitz Canok futbola ere produktu soziokulturala dela azpimarratu zuen. Askotan liburuetan, zaleei buruz hitz egiten da jokalariei buruz baino gehiago. Irakurleek irakurtzen dutenarekin identifikatuta sentitu nahi direlako gertatzen da hori, eta, hain zuzen ere, hori da jendeari gehien gustatzen zaiona eta gizartean eragina lortzen duena.
