Pausoz pauso bidea egiten

Badira sekula ahazten ez diren egunak. Eta hau horietako bat da.

Riazorren historia idatzi zuen Realak, baina emaitzaz harago bada sarri ikusten ez den errealitate bat: barrutik bizi den guztia. Autobuseko begiradak, aldagelako tentsioa, zelaira irten aurreko isilune trinkoak… eta azken eztanda askatzailea.

Goiz-goizetik nabaria zen ez zela ohiko partida bat. Kontzentrazioa, urduritasuna eta jokoan zerbait handia dagoenean soilik agertzen den ilusio eutsia. Taldea bat eginda iritsi zen, jokoan zegoenaren jakitun, baina aldi berean denboraldi osoan zehar bidelagun izan duen konfiantzaz hornituta. Besarkadak, oihuak, emozioa. Poz hutsa.

Izan ere, garaipen hutsetik harago doa hau. Denboraldi bikain baten saria da. Europara itzultzea da. Eta aurrekanporaketan gertatzen dena gertatzen dela ere, datorren sasoian Reala Europan izango dela jakitea.

Horrela bizi izan genuen barrutik. Horrela eraikitzen dira historia egiten duten uneak.