Izenak emateko txandak agortu dira
Zuri, hainbeste animatu gaituzun horri. Zuri, hainbeste sufritu duzun horri eta, jakina, titulua lortu arte taldearekin hainbeste gozatu duzun horri. Zure unea da! Reale Arena zale txuri-urdin guztien etxeko ateak ireki nahi dizkizugu, Koparekin argazki bat atera dezazun. Gurekin egon zinen une oro (Gurekin!) eta orain da gure Kopa estimatua zuekin egoteko garaia (Zuekin!).
Ostiral honetatik aurrera eta hurrengo bi asteetan (hilaren 21ean, arratsaldez, 22an eta 23an, egun osoan, eta 28an arratsaldez, eta 29an eta 30ean, egun osoan) estadiora joan ahal izango zara eta 2020ko Errege Kopako txapeldun garela egiaztatzen duen garaikurrarekin argazki bat egin. Jende pilaketak saihesteko, txandak egingo dira (hamabost minuturo). Koparekin argazkia egiteko ezinbestekoa izango da zaleek hurrengo inprimakia betetzea eta, horrela, hitzordua erreserbatzea. Bisita doan eskaintzen zaie zale txuri-urdin guztiei, beti gehienez ere sei laguneko taldeetan.
Ibilbidea
Ibilbidea Reale Arenako Iparraldeko Hondoko garajeko sarreran hasiko da, Realaren denda ofizialetik gertu. Oso garrantzitsua da garajeko sarrerara zure orduan joatea.
Sarrerako arrapala jaitsi eta jokalekura iritsiko zara. Han, Zalduak edo Gorosabelek egingo luketen bezala, banda zeharkatuko duzu, aldageletako tunelaren irteeraren pareraino iritsi arte. Han, gure armarriaren ondoan, Kopaz gozatu ahal izango duzu segundo batzuetan, eta argazki bat atera haren ondoan. Gogoratu mugikorra edo argazki kamera ekartzea! Amaitzean, estadiotik aterako zara Hegoaldeko Hondoko garajetik.
Osasun eta higiene arrazoiengatik, ezin izango da Kopa ukitu. Realeko langileak egongo dira laguntzeko gogoz. Oso garrantzitsua izango da une oro arauak errespetatzea eta segurtasun tarteak gordetzea. Ibilbide osoa aire zabalean edo ondo aireztatutako guneetan egingo da.
Erreserbatu zure lekua
Gogoratu lekua erreserbatu behar duzula (gehienez sei lagunentzat), hemen. Inprimakia bete ondoren, baieztapen mezu bat jasoko duzu (begiratu zure spam erretilua). Sarreran erakutsi beharko duzu mezua (zure telefonoan erakuts dezakezu).
Eta nahi izanez gero, gogoratu 'Txapeldunak' kamisetak erosi ditzakezula Realeko denda ofizialetan; kamiseta ezin hobea da Koparen ondoan egingo duzun argazkirako.
Zuek gurekin, eta Kopa zuekin!