Gaur goizean Euskaraldiaren laugarren edizioa eta Donostiako ‘Hamaikakoa’ aurkeztu dira Tabakaleran. Bertan Joseba Ibarburu, klubeko presidenteordea, eta Txurdin, aurtengo hamaika ‘enbaxadoreetako’ bat, egon dira. Gizarte ekimen hau maiatzaren 15etik 25era egingo da eta hizkuntza ohiturak aldatu eta euskararen erabilera sustatzea du helburu.
Aurten, parte hartze masiboa izateko helburuarekin, ariketa udaberrian egitea erabaki da, eguraldi hobea izaten delako, kalean jende gehiago ibiltzen delako eta harremanetarako zein hitz egiteko aukera gehiago egongo delako. Aurtengo Euskaraldiaren leloak dioenari jarraituz, elkar mugituz egingo dugu!
