Joan den jardunaldian Faduran izandako estropezua ahalik eta azkarren gainditu nahi dute gure gazteek eta helburu horrekin hartuko dute larunbat honetan Jose Luis Orbegozo zelaian Amorebieta. Filialak sentsazio onak ematen jarraitzen du, eta Zubietako gotorlekuan garaipen berri bat lortuz gero, sailkapenaren buruan dauden postuei eutsiko lieke.
Talde bizkaitarra, taularen erdian kokatuta dagoena, Barakaldo mendean hartu ostean iritsiko da, azken lau partidetan hiru garaipeneko bolada batean murgilduta. Proba ona izango da Xabi Alonsoren taldearentzat. Partida zuzenean emango du ETB1ek.