Sansek bina berdindu du Almeriaren aurka gaur arratsaldean Anoetan. Txuri-urdinek merituzko puntua lortu dute ligako aurkari indartsuenetako baten aurka partida parekatu batean.
Bi taldeek baloiaren jabetzari eusteko asmoz hasi dute norgehiagoka, aukera handirik sortu gabe. Donostiarren lehen iritsieran, Mariezkurrena, banakako jokaldi bikain bat egin ostean, area barruan lurrera bota dute eta epaileak penaltia adierazi du. Mariezkurrenak berak ez du hamaika metroetatik huts egin, gipuzkoarrak aurretik jarriz. Andaluziarrek erreakzionatu egin dute eta, atsedenaldia iritsi baino zertxobait lehenago, lehia berdindu dute Melameden golari esker.
Bigarren zatia modu ezin hobean hasi da gure bigarren taldearentzat Carreraren golarekin, Astiazaranen erdiraketa bikaina sare barrura bidali eta gero. Golak morala igo die etxekoei eta hirugarrena egiteko abagune arriskutsuren bat edo beste izan dute, baina ez dute asmatu azken metroetan. Minutuek aurrera egin ahala, almeriarrek gora egin dute eta, azken txanpan, Embarbak berriro berdindu du, Alex Muñozen atzerako pasea aprobetxatuta. Hortik aurrera, donostiarrek eutsi egin diete bisitarien iritsierei eta puntu bat lortu dute.
Berdinketa baliotsua Sanserentzat, sentsazioak hartzeko eta mailari geroz eta gehiago egokitzeko balio diona. Txuri-urdinek neurketa oso ona jokatu dute aurkari oso zail baten aurka eta jada lau puntu eskuratu dituzte liga hasiera zorrotz honetan. Datorren astean berriro jokatuko dute etxean, kasu honetan, Cadizen aurka.
Fitxa teknikoa:
Sanse: Fraga, Dadie, Beitia, P. Rodríguez (kap.), Agote (Balda, min. 68), Carbonell, M. Rodríguez (Gorosabel, min. 60), Ochieng (Marchal, min. 60), Astiazaran (Lebarbier, min. 74), Mariezkurrena eta Carrera (Orobengoa, min. 68).
UD Almería: Andrés Fdez., Luna, Chumi (kap.), Bonini, Álex Muñoz, Lopy, Selvi (André, min. 60), Arnau (Arribas, min. 73), Soko (L. Baptistão, min. 73), Melamed (Perović, min. 87) eta Lázaro (Embarba, min. 60).
Golak: 1-0: Mariezkurrena (pen.), min. 34; 1-1: Melamed, min. 44; 2-1: Carrera, min. 48; 2-2: Embarba, min. 84.
Epailea: Alejandro Morilla Turrión. Txartel horia erakutsi die etxeko Ochieng, Carbonell eta P. Rodriguezi eta kanpoko Chumi, Soko, Álex Muñoz eta Embarbari.
Ikusle kopurua: 4.172 ikusle.
