Realak eta Jon Guridik akordioa lortu dute azpeitiarraren kontratua 2023-24 denboraldiko amaiera arte berritzeko. Erdilariak, Jokin Aperribay presidentearekin eta Roberto Olabe futbol zuzendariarekin batera, kontratu berria sinatu du gaur eguerdian Reale Arenako bulegoetan.
Guridik Real Sociedad TVrekin hitz egin du eta "kontratua bi urtez berritzeagatik oso pozik nago. Txikitatik dudan ametsa da eta oso harro nago hemen jarraitzeaz", esan du. "Iaz oso polita izan zen, Europa Leaguearekin, Kopa irabaziz, Superkopan paper ona lortuz... Aurtengoa ilusio handiko urtea izango da eta ikusleekin harmailetan, are politagoa”, amaitu du denboraldi berriari buruz hizketan.
