_338_.jpg)
Oso gutxi falta izan da. Dena perfektu eginez ere ez da posible izan. Realak luzapena behartu du, baina ohore guztiekin galdu du Bernabeun. Sevillarako txartela ere eskuan izan du amaierarako hamar minutura. Harro gaude taldeak gaur gauean egin duenarekin. Patuak final bat zor digu publikoarekin. Haren bila itzuliko gara.
Realak ondo aurre egin dio partidari eta baloia hasieratik erabili nahi izan du. Merengeek, azkar aterata, lehen bi aukerak izan dituzte, Endricken txilena batean eta Viniciusen jaurtiketa batean. Txuri-urdinek lehen errematea izan dute, Sucicek sarearen kanpokaldera egindako urruneko jaurtiketa batean. Ordu laurdena bete zenean, ondo eramandako erasoan, kanporaketa berdindu dute donostiarrek Barreneren golari esker. Donostiarrak Lunin azpitik gainditu du. Zuriek erreakzionatu egin dute eta partida berdindu dute Endricken gol batekin, berriro ere, kontraerasoan.
Partida hasieran bezala, Imanolen taldea ondo sartu da bigarren zatian. Une oro oso sartuta egon da kanporaketan, eta beti egon da berriro berdintzeko sentsazioarekin. Zubimendik bat-bikoa izan du erremate batean, korner baten irteeran, baina Luninek baloia urrundu du. Handik gutxira iritsi da bigarren gola. Konbinazio luze baten ondoren, Marin hondoko lerrotik iritsi da eta bere erdiraketa Alabak sartu du bere atean. Ordu laurden pasatxora kanporaketa berdinduta zegoen. Realak zuhurtasunez eta ausardiaz jokatzen jarraitu du, eta amaieratik hamar minutura bat-hirukoa lortu du Oyarzabalen jaurtiketa batekin. Baina hurrengo jokaldian, amesteko astirik gabe, Bellinghamek gola sartu du kanporaketa berriro berdintzeko. Eta bost minutu geroago, korner batean, Tchouamenik etxekoen hirugarrena sartu du, berriro aurretik jartzeko. Dena galduta zegoela zirudienean, alboko falta batean, Oyarzabalen burukada batek neurketa luzapenera bidali du.
Bertan Reala sendo egon da, baina penaltietarako bost minutu falta zirela Rudigerrek gola egin du buruz korner batean eta hor amaitu da ametsa.
Reala bikain aritu da. Finalera pasatzeko egin beharreko guztia egin du, baina Real Madridek etxean duen boterea berriro ere erakutsi du azken minutuetan. Finalaren atarian geratu gara, baina burua goian edukita. Oso goian.
Fitxa teknikoa:
Real Madrid: Lunin, Lucas (kap)(Modric, min.79), Asencio (Brahim, min.106), Alaba (Fran García, min.91), Camavinga (Rudiger, min.91), Valverde, Tchouameni, Rodrygo (Guler, min.106), Vinicius, Bellingham eta Endrick (Mbappé, min.66).
Real Sociedad: Remiro, Aramburu (Traoré, min.79), Zubeldia, Aguerd (Aritz, min.27), Aihen, Zubimendi, Marín (Olasagasti, min.91), Sučić, Barrene (Sergio Gómez, min.68), Take eta Oyarzabal (kap) (Óskarsson, min.106).
Goles: 0-1: Barrene, min.16. 1-1: Endrick, min.30. 1-2: Alaba (b.a.), min.72. 1-3: Oyarzabal, min.80. 2-3: Bellingham, min.81. 3-3: Tchouameni, min.86. 3-4: Oyarzabal, min.93. 4-4: Rudiger, min.115.
Epailea: Alberola Rojas. Txartel horiak etxeko Camavingari eta Aramburu eta Olasagastirentzat.