Lehen garaipena

Realak denboraldiko lehen garaipena lortu du gaur gauean Bartzelonan jokatutako norgehiagokan. Txuri-urdinek huts eta bat irabazi dute Take Kuboren golari esker, Imanolen mutilek hiru puntuak lortzeko izan dituzten aukera bakanetako bat aprobetxatu eta gero.

Talde perikoa oso ondo sartu da partidan. Intentsitatea jarri dio eta RCDE Stadium-eko harmailak piztu ditu. Donostiarrak, pixkanaka, baloiaren jabetza bereganatuz joan dira, eta, nahiz eta goran ‘puntx-a’ falta izan zaien, hobeto aritu dira partidan. Sergio Gomezen falta jaurtiketa bat, atezainak aldenduta, eta Turrientesek ezkerrarekin gora botatako errematea izan dira lehen zatiko aukera onenak.
Bigarren zatian Imanolen mutilek oso itxura ona izan dute, baina Velizek Remiroren aurrean asmatu ez duen etxekoen kontraeraso batek txuri-urdinen minutu onak gelditu ditu. Azken txanpan, Take Kuboren jokaldi pertsonal bati esker, gipuzkoarrek norgehiagoka irabaztea lortu dute. Japoniarrak defentsa pare bat atzean utzi ditu eta jaurtiketa indartsu eta ongi bideratutako batekin gainditu du etxeko atezaina.
Garaipen ona lehen eguneko sentsazio txarrak ezabatzeko eta etorkizunari baikortasunez begiratzeko. Orain, lehenaren bila etxean. Asteazkenean izango da, Deportivo Alavesen aurka. We are Real.

Fitxa teknikoa:

RCD Espanyol: Joan García, El Hilali (Tejero, min.87), Kumbulla, Cabrera, Romero (Milla, min.87), Gragera (Roca, min.83), Kral, Carreras (Aguado, min.83), Puado (cap), Cardona (Oliván, min.68) eta Veliz.

Real Sociedad: Remiro, Traoré (Aramburu, min.83), Aritz, Pacheco, Javi López, Zubimendi, Turrientes (Olasagasti, min.66), Brais Méndez (Take, min.66), Sergio Gómez, Becker (Marín, min.87) eta Oyarzabal (cap)(Sadiq, min.66).

Gola: 0-1: Take, min.80

Epailea: Melero López. Txartel horiak etxeko Carreras eta Kralentzat eta Turrientes eta Oyarzabal kanpotarrentzat.